گۆڕان نیوز-

ئەر دەنگ کەری، دەنگاوەنە

   دەنگیچ مەکەری، پەنگاوەنە!!

جەژنەو زەماوەندەو پیرشالیاروو هەورامانی، یادگاروو فەرهەنگ و تارێخ و ویەردەو هەورامانیا و هەرساڵێو جە گردوو یاگەکاو ئێران و دنیای جە هەورامان و جە زەماوەندٚەو پیرشالیاری ، دیدٚەن کەرا ، بەڵام بڕێو قسێ و باسێ جە لاو بڕێو کەسێ جە هاڵیگای قەسالەین(فەزای مەجازی) تایبەت جە تاقمەو کاناڵەکاو تلێگرام ، ئەنێستا و … ئادٚیچ بە داخەو جە وێما و هامزوانەکاما جە پەراوێزوو ئی جەژنێ و مەراسێمەکەینە، ئێژایی ، هۆویەت و کێ بیەو وێشا بەردشا چێروو پەرس و سوئالێ.

نەرەی واتەنی: بە پوازەو وێم ترەکوو

هەورامان و هەورامی زوان بە مێمانداری و حورمەت نیای پەی مێمانی نامدارێنێ  و ئینە پەی گرد کەسی ئەونەشاریان، ئەگەر مێمانێو تاڵش بۆ و خودٚای نەکەردە، تۆشوو گیر و چەڵەمێو ئاما بۆ گورج و ئازا لوان پێواشەو و هەرمانەکێش پڕنانە و یام پێسەو مێمانەکەیش کە بە عەزرەتەو پەی وینای و چەم پنەکەوتەوبەرنامەو پیرشالیاری و سەفوو حەی ئەڵڵاو دەروێشەکاو سەروو لەقوو درەختوو وەزەکێ پاڵوو یانەو پیری کەوتەرە و زامدار بێ و خەفەتش نیا سەروو دڵوو گردیماوە و ئەچا وەختەنە ئێمەیچ ئەچاگە بێنمێ و خەڵکوو هەورامانی و دەوربەر و تایبەت چەمدٚاروو مەراسێمەکەی گورج و ئازا مێمانەکەشا یاونا لاو ئامپەلاسەکەی و یاگێ دەسوەشی بێ و ئەڵبەت شوکر پەی خودٚای بە خێر گێڵاوە و زامەکێش فرێ نەبێنێ و هەواڵوو سڵامەتیش جە زوانوو وێشنە جە فەزای مەجازی و کاناڵەکانە، وەڵا کریاوە.

واتەو ئینەیە دار و درەخت لاو گردیما تایبەت خەڵکوو هەورامانی و تایبەتەریچ وەزی درەختوو بوومی و وێمانەو مەحاڵەو هەورامانیا و یاگێ ئێژایی و هەمیەتین و بڕیای لەق و شاخوو درەختەکەی هەرمانێوە عالە نەبێ وچنی ژیوگاپارێزنای خەڵکەکەیما فرە دوور بێ (هەرچن واتەنشا پەی یانەو ساحێب وەزەکێ بیەن بائێسوو گیر و گرێفت ترەکنای دیواروو یانەیش، ئەڵبەت دماتەر چارەسەرش کەرێ و نەک چل ولەقوو درەختی بەسەزوانی بڕیۆ هەتا مێمانێوتەر ئازار نەدریۆ ، ئەڵبەت درەخت یاگێ نشینگا و جەولانوو مێمانی و وەختوو وەز تەکنایچ نەبێ!… مێمان نەوازی هەورامی زوانی  هەتا یاگێوا چل و لەقوو درەختی بەسەزوان پاچیۆرە و هەتا مێمان وەشتەرش بۆ! واچی چێش؟

گلێرەوبیەی خەڵکەکەی جە وێمانە و مێمان ئەچا یاگێنە(وەروو یانەو پیری) و سەروو بانەکاو دەوروبەری(ئەژماروو خەڵکەکەی فرەتەر بیەن و بانوو یانەکا ئا وەزنێ هۆر نمەگێرۆ)، یاگێوە سەخت و سەخڵەتەنە و مشیۆ چارەسەری یەکجاری کریۆ ،ئەڵبەت هەتا ئیسە مێمانەکاو پیروو هەورامانی بە وەشی و سڵامەتی گێڵەنێوە پەی یانە و وەڵاتوو وێشا

خاڵێوەتەرە سەروو پلاماروو کەسیوی دڵپاک و ناتەمامی جەسە و ڕۆحی و سەندرومی بە نامێ مەڵڵاعێرفان ، کە دووربینوو مێمانیوی(ئەڵبەت بنەڕەتنە خەڵکووهەورامان تەختی بێ) و شوکرانەش بۆ کاکەی دووربین بەدەس بە زوانی شیرین مەڵڵاعێرفانش لاوناوە و جە حەرەکەتوو مەڵڵاعێرفانی دڵوەر نەبیەن و واتەو ئینەی جە فرەو یاگەکانە پەیوەندیشا گێرتەن و واتەنشا ئەگەر دوربینوو خەبەرگوزارەکەی خرابیا بۆ حازرێنمێ خەرجەکەش بدٚەیمێ و ئینەیچ مەڵڵاعێرفانی ئەپا جۆرە گردیما مژناسمێش و ئەژناسیان جە فیلمێوەنە جە فیلمبەردارەکەی داوا عەفوە و بەخشای کەرۆ کە ئینە وێش ئەوپەڕوو قسێن ،مەڵڵاعێرفان دنیاو وێشەنه سەیر و سلووکی عارێفانە کەرۆ ،ئێمە و هیچ کەس خەبەردار نیا و فەقەت هەرچی کەس، خودٚا، وێش مزانۆ ،هەرچن داوا بەخشای و عەفوێ، گەورەیی ئا کەسیە مرمانۆ، بەڵام مەڵڵاعێرفان،جیاواز بێ….

چنی حورمەت و وەشەویسیم پەی گردوو مێمانەکاو یانەوپیری

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *